É obxecto deste procedemento administrativo facilitar a xestión de solicitudes de inscrición no Servizo de transporte daqueles/as alumnos/as do concello estudantes de bacharelato ou ciclos formativos en centros de ensino públicos dos concellos de Negreira ou Santa Comba, nalgunha das seguintes modalidades:

• Bacharelato.
• Ciclo de formación profesional básica *
• Ciclo medio de formación profesional. *
• Ciclo superior de formación profesional. *

* Nas modalidades de Réxime ordinario, Formación profesional Básica e Formación profesional dual.

Os/As estudantes matriculados nun dos centros públicos de Negreira ou Santa Comba sinalados a continuación:

• Instituto de Educación Secundaria Xulián Magariños (Negreira).
• Instituto de Educación Secundaria Terra do Xallas (Santa Comba).

Estes estudantes non disporán de medios propios para desprazarse aos centros de ensino anteriormente citados nin terán a opción de facer uso do transporte público, xa sexa pola inexistencia de liñas regulares de transporte ou, de existir estas, os horarios non concorden coas horas de chegada e/ou saída aos centros de ensino.

O prazo de presentación de instancias será de sete (7) días naturais a contar dende o día seguinte á publicación destas bases na Sede electrónica do Concello da Baña e na páxina web municipal. Transcorrido este prazo non se admitirán novas inscricións.
As solicitudes presentaranse segundo os modelos normalizados, que deberán ser asinadas pola nai, pai, titor/a legal ou membro da familia de acollida da nena ou neno e presentarse no Rexistro Xeral do Concello ou por calquera dos medios previstos no artigo 16.4 da Lei 39/2015, do 1 de outubro, do procedemento administrativo común das administracións públicas.
A solicitude será única para tódolos/as fillos/as. Se estivesen admitidos/as en centros docentes diferentes presentarán unha solicitude por cada fillo/a.

Consideraranse admitidas todas as persoas que, cumprindo os requisitos, acheguen a documentación necesaria en forma e prazo.
O pagamento do servizo efectuarase por domiciliación bancaria e de forma mensual, agás o primeiro cargo, que se realizará unha vez transcorridos os meses de setembro e outubro.